¿Kiñe zomo pepi txipay ñi küzaw mu tañi ilelmeafiel ñi püñeñ?
May, ti pu ñuke küzawpelu elugekey ñi txipayal tañi ilelafiel ñi pu püñeñ, fey mülenufule rume sala cuna kishu ñi küzawwe mew. Tüfachi zugu elugeay kom pu küzawchi zomo nielu püñeñ petu püwülnulu epu txipantu, fey mew elugeay kiñe hora well zoy hora konkülelu ñi küzaw mu tañi moyolmeafiel well tañi ilelmeafiel tañi pu püñeñ.
¿Kiñe zomo zewmale ñi fuero maternal, fey ka pepi ilelmeafuy ñi püñeñ?
May, tüfachi zugu wechukey fey puwültxipantule epu txipantu ti püchiche.
¿Feyti püñeñ günaytugele ka ilelgele ruka mew, fey feyti ñuke ka eluñmagekay ti zugu?
May, ti ñuke ka niey kiñe hora rume tañi ilelmeafiel ñi püñeñ. chew püle rume mülele ti püñeñ well iney rume günaytumekele (chuchu, kuku, palu, ñukentu, kake reñma kay) fey pepi amuay ñuke.
Feyti tiempo tañi amuam ñi püñeñ mu, fey ka konay feyi hora mu tañi eluñmageel?
Felelay, fey kam tüfachi hora fey re tañi ilelafiel ñi püñeñ. Ti ñuke mülele ñi amual kañpüle tañi ilelmeafiel ti püñeñ, fey zoy eluñmageay hora tañi pepi amuam ka küpatuam. Ti empresa nielu sala cuna, ka müley ñi wülal ti tiempo ti pasaje tañi amuam ti ñuke tañi ilelmeafiel ñi püñeñ.
¿Ti chaw elugeafuy tüfachi permiso?
Ti chaw ka ti ñuke küzawkülele egu, fey mür azkünuwafuy tañi eluñmageal ti zugu ti chaw. Feytachi zugu müley ñi chalintukuafiel egu kiñe wirin mew tañi genküzawgelu mu (feyti chaw ka ti ñuke), fey mu müley ñi femkünual ti zugu petu ñi kiñe küyen eluñmagenon ti zugu. Feytachi wirin müley ñi firmantukuafiel ti chaw ka ti ñuke, ka müley ñi amulelafiel kiñe kopia ta Inspección del trabajo mew.
Ka femgechi ayirpuleegu tañi kagelu tañi eluñmagetual ti zugu, ka femgechi müley ñi kimelelafiel ti zugu tañi genküzawgelu mu ka ti Inspección del trabajo mew. Fey wünechi txipantu mu elugefule zugu ñuke, fey kagelu txipantu elugeafuy chaw.
¿Chem zugu müley re ti chaw günaytunele ñi choyiñ?
Ti küzawfe chaw feley ñi ilelafiel ñi yall, fey elugenmu zugu sentencia judicial mu, well lhamu ta ñuke well pepiluwnule ñuke tañi günaytual ñi püñeñ tüfachi zugu mew.
¿Eluñmageafuy tüfachi zugu kiñe che chawgenolu well ñukegenolu ti püchiche mew?
Kiñe küzawfe elugele kiñe tuición tañi günaytunieafiel kiñe püchiche, fey mu elufalgeafuy tüfachi zugu chawgenofule well ñukegenofule rume. Feytachi zugu ka amulafuy ti afkazi nielu feyti rüf nielu ti tuición ti püchiche mew.
¿Chem chumafuy pinole tañi wülafiel ti zugu feyti genküzawgelu?
Feyti genküzawgelu zalluntukufalgeafuy ti Inspección del Trabajo mew.
¿Tunte antü am elugekey tüfachi permiso? (¿En qué horario/en qué hora del día se puede usar este permiso?)
Müley ñi elkünuafiel ti zugu ti genküzawgelu egu, fey mu fey ta küla txoy zugu mu feleafuy: 1) chem txoy antü rume konkülelu ñi küzawkülen antü.
2) Wüzamgeafuy epu txoy antü mu
3) Elkünugeal kiñe ragiñ hora kam kiñe hora petu ñi llitunon ti küzawün antü, well rupan ñi zewmael ti küzawün antü.